مئات المواطنين مطحونين والحكومة مازالت تردد أحلامها الورديةعاوز تعمل بطاقة ؟؟ إسمك غلط وعاوز تصلحه ؟؟ أسمك ساقط من بيانات الكمبيوتر؟؟
إطـــــــــــــــــــــــــــمن هيطلع عين أهلك
كنت أعتقد أن الأمر سهلا وأن الحكومة الإلكترونية ستحل مشاكل كثيرة نعانى منها أولها الروتين الغبي
الذى مللنا منه لدرجة أنه أصبح طابع مقدس لدى الموظفين المصريين لا ينفصل عنهم
وأعتقدت أن فيلم (( المراكبي )) بطولة العمدة صلاح السعدنى
والذى يتناول مشكلة الروتين وبهدلة مواطن مصرى غلبان عاوز يعمل بطاقة
سيصبح _ هذا الفيلم _فى زاكرة النسيان ليعبر عن حقبة مظلمة من تاريخ مصر (( حلوة حقبة دى )
وتمر الأيام وانا فى خيالى وفى تصوراتى الوهميه التى صنعتها لنا الحكومة بأجهزة إعلامها الجرثومية
حتى جاء هذا اليوم الذى ذهبت فيه لإستخراج شهادو ميلاد لابى وأمى لأكتشف ان هناك خطأ فى الأسماء
وقد ذكرت لكم فى مدونتى ما حدث لى يومها من معاملة استفزازية من الموظفين
وظللت فى قمه غيظى وتجهمى حتى أغوانى شيطانى بكتابة شكوى فى موقع الحكومة الالكترونية
وفوجئت بهم يرسلون لى تانى يوم علشان اروح اصلح الاسم
مية مية والله ايه النشاط دا ؟؟؟!!!!
أكيد اللى حصل من الموظفين قبل كدا حادثة فردية ( زى ما المسئولين وجعوا دماغنا بهذه المقولة )
ذهبت تانى يوم الى السجل المدنى وأنا متخيل ان الموظف هيصلح لى الاسم وانا واقف
ولم أكن أعلم انا هذه هى الخطوة الأولى فى طريق الأشواك
البداية طابور طويل من الناس الغلابة اللى جايين من مختلف الاقاليم
دا عاوز يعمل بطاقة ودا يصلح اسم ودا يغير مهنه
ومنذ الساعه 9 وهم على هذه الحالة والموظفين غايبين واللى مش غايب
مش عاوز يشتغل
تقدمت الى ذلك الأمين الذى يجلس على باب السجل ودار بينه وبينى الحوار الاتى
_ سلاموا عليكم
_ وعليكم السلام
_ بقولك ياباشا انا جاى اغير اسم وانتم اللى باعتين لى و .....
_ استنى هناك مع اللى واقفين
_ دا انا جاى هغير حاجة موماشي على طول
_ مقدرش اعمل لك شئ استنى هناك
امرنا لله نقف ونستنى
وقفت وكانت الساعه 2
وكان الجميع متذمر من سوء المعاملة فالجو شديد الحرارة والطابور من الساعه 9
سمعت أحدهم يقول : انا هنا من الساعه 10 والطابور دا مش راضى يمشى
وهذا من الساعه 9 وهذا 11 وهذا جاء من الشرقيه بلدياتى يععنى ودا من البحيرة ودا من ......
ظلننا منتظرين حتى الساعه 5 وأثناء هذه الفترة يأتى الرائد ويأخذ 10افراد ويدخلهم ويختفون لمدة طويلة
وأيضا كان يخرج علينا بعض الناس اللى مفروض خلصوا مصالحهم فنسألهم آملين
( هو فيه زحمه فوق )
فيردوا باسمين انا هنا من الساعه 9 ولسة مخلص دلوقتى
المهم
مر اليوم الاول على سلام
وعلمت من الموظف الذى دخلت له الساعه 6 ( خلوا بالكم انا جاى الساعه 2)
فطلب منى بعض الاوراق
قيد عائلى وصورة بطاقة ....
وعندما أحضرتهم وانا فرحان شعيد لان الوش دا خلاص هينتهى
أفاجئ به يطلب منى ورق جديد
_ ياباشا انت قلتى هات الورق دا بس مقلتش خالص هات الروقة دى
_ الورقة دى لازمه
_ يعنى دا اخر حاجة
_ ان شاء الله
وأذهب لأحضر الورق واعود له فى اليوم التانى وانا اعانى من الطابور والملل والأرهاق والحر
وأفاجئ به فى كل مرة يطلب شئ جديد
واضغط على أعصابي وأتحمل وأسطت بعد أن ادخل فى مناقشة يائسة معه
_ انتم ليه مش بتقولول عاوزين ايه مرة واحدة.. انا باجى كل يوم من الشرقيه
_ خلاص دى اخر حاجة
_يووووووووووووووه كل مرة تقول كدا
وظللت هكذا حتى الحمد لله بعد عناء خلصت الورق ومنتظر تصحيح الاسم بعد 21 كما قالى لى الموظف
فى هذه الاثناء سمعت شكاوى بعض المواطنين الغلابة
ع. الدسوقى
محاسب
جاء علشان يغير مهنته
وفى كل مرة يعانى ما اعانية ويقول لى
لهم حق ماهم مش حاسين بينا
ما أحنا بالنسبة لهم مش بشر اصلا
أ. م
عامل 60 سنه
يقول
انا تعبت . زى ما نكون ولامؤاخذه بقر مش بيحسوا بينا
كل يوم يقولوا بكرة بكرة بكرة
ص.ح
طالب
كل يوم يقولوا تسهيلات تسهيلا ت يجوا بقى بتوع البرج العاجى يشوفوا ايه اللى بيحصل لنا
السؤال الأخير الذى يفرض نفسه
أمتى بقى هنعيش فى بلادنا مرتاحين ؟؟؟
امتى بقى هنرتاح فى بلدد اتعودنا منها على الاهمال
أمتى بقى هنكون بجد مواطنين من الدرجة الاولى مش الدرحة العاشرة ؟؟؟؟
امتى الواحد فينا لما يعوز يخلص ورق ينجزه فى نفس اليوم ؟؟؟
امتى المسئولين يبطلوا يرددوا الأوهام ولما نبين لهم انها أوهام يقولوا سوء تنفيذ أوامر
فانت برضه ياسي مسئول مهمتك انك تراقب تنفيذ الأوامر على أكمل وجه
مش شغلتك اصدار الاوامر وخلاص
أشـــــــــــــــــــــــــــــرف مــــــــــقـــــــــــــــــــلد
